可以享受活動嘅過程,識到一班朋友,見識多啲,擴闊咗自己嘅知識領域。我可以感染到身邊嘅人,一齊諗下點做到友善城市,最有意義係見到有個改變,好開心。(屯門區)
有能力嘅都主動啲,自己開通啲,好積極嘅,「齡活大使」即係精靈長者。(西貢區)
我有參加過「齡活大使」,有一種榮幸,光榮。裏面嘅知識好寳貴。(元朗區)
我對「齡活大使」嘅身份有親切感。著住件衫,就會有推廣「齡活大使」嘅責任同使命感。我學多咗嘢,就將我學嘅嘢話俾其他人聽。(荃灣區)
第一,想服務社會,我可以做到啲幫社會嘅,我都會想做;第二,要好認真去聽長者講自己,了解吓。第三,要唔怕辛苦。有時天氣熱,都要推架車仔,拎啲嘢去送俾長者。 (深水埗區)
報咗做「齡活大使」,學咗嘢之後,都會發聲,睇下有咩地方可以改善吓,提出要求。「齡活大使」身份俾人認受,可以發多啲聲,尤其對我哋唔係幾識字嘅長者,係有幫助㗎。(灣仔區)
敢發聲、有判斷力,想做一樣嘢,要判斷做唔做得到,同埋肯出嚟做,要出好多牙力。(南區)
最緊要親民、親善同帶笑容,講嘢嘅語氣要溫和,人哋易接受啲,知識經驗要豐富,人哋問你要答到,睇多啲新聞,唔會同社會脫節。(離島區)
我有一份責任去帶領一班人做到我希望佢可以做嘅嘢。(黃大仙區)
講得「齡活大使」,梗係要精靈,同埋有活力。(東區)
抱有一份愛心,關心,同埋好細心咁去觀察,有同理心,慢慢俾啲耐性佢去傾,好細心咁關心佢(長者),佢哋感覺到嘅,自然慢慢同你熟落,肯去將自己嘅故事講俾你聽,同埋有返關心你嗰份心。(中西區)
我講嘢友善啲,容易同佢(長者)溝通融合。
同人哋交往,觀察細微咗,細緻咗。 發覺個人係開朗好多喎,同埋有自信心好多喎。覺得個社會無拋棄到我,覺得自己仲有價值,呢個係好重要。(油尖旺區)
做咗「齡活大使」之後,訓練咗我哋講嘢會有信心比較大膽啲,以前就比較怕事啲。 同一啲老友記寫揮春過年,佢哋好開心。原來我退咗休都唔係淨係響屋企,都幾忙,可以再做啲嘢。(沙田區)
我就學到點樣拍片嚟發聲。有啲長者文字、書寫、表達能力唔係咁高,我哋學咗拍嘢,將個問題影出嚟,咁就容易啲明白。(南區)
我就好開心,靈活咗,好活躍,話題多咗。最大嘅得著就係自己咁樣嘅年齡都係「老有所為」,唔係話人廢咗冇用,自己能力做得到幫到人。我參加完之後有好多話題同我兩個孫講,唔會有脫節。(離島區)
内容好豐富,有講座、課程、出去外訪,又要整記錄同遊戲,介紹朋友認識八大範疇,資料係非常之豐富,内容充實,好有意思,真係做到啲野。(屯門區)
投入感嘅轉變就係我同佢哋(老友記) 可以打成一片,我覺得我被欣賞囉。(黃大仙區)
留意多左啲設施,以前無咁care(關注),爛咪爛,由得佢爛,但依家見到爛呢就好似好唔舒服,因為我明白到呢啲設施係為咗啲長者去做。(大埔區)
可以去睇下人哋個區嘅建設,點樣推動,點樣改善,假如無「齡活大使」呢個活動,大家就無呢種機會交流囉。(元朗區)
以前(對社區)唔會理咁多,唔會出聲話:「要改善返」;而家參加社區活動多咗,我哋明白到可能有(機會改善),有咁嘅渠道(反映意見),要溝通,政府嘅同政府講,領展嘅,可以去同領展講。(西貢區)
我哋參加「居無礙」嗰班人就組織去附近啲商場或者舖頭,嗌佢哋商戶幫手參加,幫嗰啲有需要嘅長者進行維修嘅時候就收費平啲。起先,大家都覺得好困難,因為我哋嘅目的係要求人哋俾啲優惠我哋呀嘛,但去到實際進行嘅時候,都意外發現好多都好樂意去參加,同我哋好好傾,好樂意幫長者嘅,大家好夾,亦間接鼓勵咗我哋。(觀塘區)
我哋嗰時做「『耆』思妙『相』‧ 藏寶圖」嘅時侯,曾經訪問過一間食肆。好特別嘅係,佢就比較樂意去聘請一啲退咗休嘅朋友,甚至乎唔係做開飲食嗰行嘅都請,會有啲培訓俾佢哋,返工時間都彈性,可以容許佢哋只返四個鐘。同佢哋傾計,發覺有少少工作,個人係開朗好多,同埋有自信心好多。錢可能係唔多,但係會覺得個社會無拋棄到佢,覺得自己仲有價值,呢個係好重要。(油尖旺區)
「賽馬會齡活城市計劃」最成功就係可以牽動到鄉郊。好似「鄉郊樂『屯』『元』」,可以去睇下人哋個區嘅建設,點樣推動,點樣改善。(元朗區)